Björn Pétursson frá sléttu 1867–1953

Björn fæddist 4. okt, 1867 á Sléttu í Fljótum og ólst þar upp og kenndi hann sig ætíð við þann bæ. Ekki naut hann meiri menntunar en tíðkaðist á þeim tíma að bjargast við. 

   Hann var fróðleiksfús og skarpgáfaður. Skáldagáfan vaknaði snemma hjá honum, en lítt hampaði hann henni á yngri árum. Hann var mikill unnandi ljóðs og lands, mannvinur og dýravinur og hvarvetna vel látinn. Árið 1892 giftist hann Dorotheu Jóelsdóttur frá Sauðanesi á Upsaströnd. Hófu búskap á Bakka í Austur Fljótum. Árið 1899 fluttu þau að Stóru-Þverá í Fljótum og bjuggu þar til 1904 er þau tóku sig upp með börn sín, öll nema Pétur, yngsta barn þeirra, og fluttu til Kanada. Þar komst Björn að hjá Póstþjónustunni og vann þar þann tíma sem hann var í Kanada að undanskyldum þrem árum er hann gengdi herþjónustu í fyrri heimsstyrjöldinni. Ekki þurfti hann þó að fara á vígvöll því hann slasaðist illa í Bretlandi og var sendur heimleiðis. 

 Björn fluttist til Íslands 1930 og yfirgaf fjölskyldu sína sem varð eftir vestanhafs. Eftir heimkomuna var Björn fyrst hjá Pétri syni sínum að Keldum í Sléttuhlíð en lengst af á Syðstahóli, hjá Júlíusi Geirssyni bónda og konu hans, Guðrúnu Halldórsdóttur hálfsystur Dorotheu konu Björns. Júlíus flytur að Móskógum á Bökkum 1945 og fór Björn með honum þangað og bjó þar til æviloka. Björn lést í maí 1953.