Bragi
er safn- og rannsóknagrunnur sem hefur margþætt hlutverk:
·
Að skrásetja áreiðanlegar útgáfur íslensks kveðskapar og gera grein fyrir
aldri einstakra verka eftir því sem næst verður komist, veita upplýsingar um
höfunda og bragarhætti og tilurð skáldskaparins þar sem við á og gera grein
fyrir heimildum.
·
Að þróa rannsóknar- og greiningartæki sem nýtist á ýmsum sviðum: bragfræði,
málfræði, bókmenntum, sagnfræði og þjóðfræði.
Í Braga hefur verið unnið að myndrænni
framsetningu á einkennum bragforma hvað varðar bragliðagerð, rím og
stuðlasetningu. Myndræna framsetningin er einkum ætluð til skýringar og
einföldunar og hefur kennslufræðilegt gildi. Hún grundvallast á kennistreng sem
er nákvæm bragarháttarlýsing sem kallar fram bragmyndina.
Í Handbók
er gerð grein fyrir uppbyggingu vefsins og hinni myndrænu frasetningu hans. Í
henni hafa einnig verið lögð drög að skrá yfir hugtök og heiti í bragfræði. Sú
vinna er skammt komin en þó er nú þegar hægt að fletta upp á helstu
meginhugtökum.
Bragarhættir: Bragarhættir eru
sýndir í myndrænu formi (bragmynd) sem tölvan býr til út frá
svonefndum kennistreng eins og áður segir. Þá eru einnig gefin dæmi
um einstaka hætti. Stefnt er að því að háttgreina í Braga megnið af hefðbundnum
kveðskap íslenskum frá upphafi til okkar daga. Út frá þeirri skráningu yrði
unnt að gera rækilega grein fyrir íslenskri bragsögu. Ýmsar villur og gallar
eru ennþá í þessari einingu. Rangar bragmyndir eru við sum ljóðanna og
ennþá vantar hálfrím í hina myndrænu túlkun. Á næstunni verður unnið að því að
koma þessum þáttum smám saman í lag.
Ljóð: Nú hafa verið birt 3012 heil kvæði á Braga - óðfræðivef (voru 2677 í september 2021). Þar á meðal eru fjölmörg eddukvæði,
allir sálmar Marteins Einarssonar úr Sálmakveri hans frá 1555, nær öll þekkt
kvæði Einars í Eydölum, allnokkrir rímnaflokkar, nokkrir sagnadansar og allir
Passíusálmar Hallgríms Péturssonar og fjölmargir aðrir sálmar hans. Stefnt er
að því að færa inn í þessa einingu sem mest af íslenskum kveðskap, að minnsta
kosti fram til 1820. Kostað verður kapps um að hafa alltaf besta fáanlegan
texta ljóðanna í þessari einingu.
Lausavísur: Skráðar hafa verið 2056 lausavísur (voru 2007 í september 2021) og þær flokkaðar og gerð grein fyrir tildrögum þeirra og sögum sem þeim
tengjast séu þær þekktar. Þessi eining
ætti að vera orðin nokkuð hnökralítil þótt vafalaust megi þar að ýmsu finna.
Nokkrar fornar dróttkveðnar vísur hafa verið færðar hér inn og sumar þeirra
skýrðar. Áfram verður unnið að því að skrá í þessa einingu lausavísur, einkum
þó frá eldri tíma.
Vinna við Braga. Höfundar
hinnar nýju myndrænu framsetningar á Braga eru
Kristján Eiríksson og Jón Bragi Björgvinsson. Kristján hannaði hin myndrænu
form en Jón Bragi sá um útfærslu þeirra á rafrænu formi og hönnun
gagnagrunnsins fyrir háttatal. (Sjá: Óðfræðiágrip sem
þeir gáfu út á lokadag vetrarvertíðar 2001). — Margir hafa síðan komið að
vinnu við Braga - óðfræðivef frá
því honum var ýtt úr vör. Tölvuvinnslu og forritun annast Trausti Dagsson og Magnús Ágúst Magnússon.
Kristján Eiríksson hefur allt frá
stofnun unnið að bragskráningu og fræðilegri vinnu en fleiri hafa þar komið að,
t. d. Yelena Sesselja Helgadóttir og Sigurborg Hilmarsdóttir. Þá hafa
eftirtaldir unnið að því að koma lausavísum og helgikvæðum á tölvutækt form og
samræma stafsetningu þeirra: Katrín Ragnarsdóttir, Sverrir Norland og
Reynhildur Karlsdóttir. Hefur talsvert af því efni verið sett inn á Braga en þar er þó ennþá
allmikið óunnið.
Bragi og innlent samstarf. Fyrir not vefsins skiptir miklu að skjala- og bókasöfnum víðsvegar um land
gefst nú kostur á að fá sitt rúm á vefnum. Fyrstur rann Vísnavefur Skagfirðinga
þar inn með öllum sínum lausavísnafjölda. Næst bættust í hópinn Kvæðasafn
Vestmannaeyja og Kvæðasafn Kópavogs en sáralítið hefur ennþá verið skráð inn á
þær einingar. Í byrjun árs 2013 bættust og við Héraðsskjalasafn Mosfellsbæjar
og Héraðsskjalasafn Árnesinga og hefur nokkuð verið skráð inn á þau söfn.
Einnig var opnaður vísnavefur fyrir Þingeyinga á Braga en skráning á hann er
engin enn sem komið er. Skjalasafn Svarfdæla á Dalvík bættist í hópinn í lok
árs 2013 og nefnist safn þess Haraldur. Í fyrstu viku ágúst 2014 var opnaður
undir Braga kvæða- og vísnavefurinn Húnaflói. Ingi Heiðmar Jónsson stýrir þeim
vef. Hann spannar svæðið frá Vatnsskarði til nyrstu stranda vestan
Húnaflóa. Hver stofnun (útgefandi) ber ábyrgð á sínu efni.
Samstarf við Alfræði íslenskra
bókmennta (Ástráð Eysteinsson og Garðar Baldvinsson). Alfræðin fær að nýta
sér upplýsingar af Braga að vild (þarf þó vitaskuld að geta heimilda) og Bragi
fær á sama hátt að nýta upplýsingar alfræðinnar.
[Önnur tungumál. Á Alþjóðaþingi
esperantista sem haldið var í Hörpu sumarið 2013 var í tengslum við Braga
opnaður bragfræðivefur fyrir kveðskap á Esperanto, Poetika retejo. Er það fyrsti vefurinn á öðrum málum en íslensku sem tengist Braga. Þegar
hafa verið færð inn á hann 278 ljóð. Þar af eru 125 þýdd úr íslensku. Þá var á
fyrrihluta árs 2014 opnaður norskur vefur á Braganetinu, Skalde Brage, í samvinnu við Norðmenn (Gro Tove Sandsmark, Ingeborg Huus og Klaus
Myrvoll). Báðir þessir vefir gætu haft talsverða þýðingu fyrir rannsóknir í
samanburðarbókmenntum þegar fram líða stundir.
Þessir vefir eru þó ekki vistaðir á
Braganetinu]
Á næstunni verður kappkostað að treysta grunninn og bæta einstakar einingar
hans. Áhersla verður lögð á að bæta skráningu
bragarhátta. Áfram verður unnið að skráningu ljóða
og lausavísna og lögð áhersla á að fá skáldskap eftir höfunda sem víðast af landinu og tengja við bæja- og staðatal sem nú er unnið að. Jafnframt verður leitast við eftir föngum
að birta á vefnum kveðskap sem fram að þessu hefur eingöngu verið til í
handritum eða öðrum lítt aðgengilegum heimildum. Þá verður fram haldið vinnu við Handbók og Hugtök og gert einfaldara að fletta upp skáldskap frá ákveðnum tímabilum. Líka verður stefnt að því að skilgreina efnisflokka ljóða og lausavísna og færa skilgreiningar þeirra inn á Handbók Braga.
Í upphafi þessa árs var mynduð fimm manna ritstjórn Braga og áttu sæti í henni: Haukur Þorgeirsson, Kristján Eiríksson, Magnús Ágúst Magnússon, Rósa Þorsteinsdóttir og Þórunn Sigurðardóttir.
Þá hefur Haukur Þorgeirsson nú tekið við af Kristjáni Eiríkssyni sem ritstjóri Braga.
23. nóvember 2022.
Kristján Eiríksson tók aftur við ritstjórn Braga seinni hluta árs 2023.