Páll Melsted og Thora Melsted 3. nóv. 1909 (Gullbrúðkaupskveðja frá Kvennaskóla Reykjavíkur)

Blessuð tíð, sem heim ber ykkur hjónum
heillum krýndan gullinn brúðkaupsdag;
liðnar tíðir svífa fyrir sjónum,
sjáið þessa stund með gleðibrag!
Löng var samvist, lofsæl brautin farna,
léð var fáum svo að hálfna öld;
einstakt dæmi enda mun þess gjarna
endurminnst af Snælands barnafjöld.

Dagur þver og nálgast tekur njóla,
njólan sú sem öllum kveðin er.
Þiggið þá frá ykkar eigin skóla
óskamálin fram sem berum vér.
Njótið gömul gulls í heiðurs sveigi
geisla við, er blíðust kvöldsól ljær,
og er sest hún sæmdar fylgi degi
svo sem heiðnótt beggja minning skær.