Enn er lífsins lokað hlið

Enn er lífsins lokað hlið.
Lauf af stofni fokið.
Hér hefur skemman skilið við.
Skyldustörfum lokið.

Geymdi hún lengi föngin fríð.
Flestu hnignað getur.
Þó munu elli, storm og stríð
standa fáir betur.

Stóðstu lengi frjáls á fold.
Fögur varstu sýnum.
Nú sér enginn utan mold
eftir af leifum þínum.

Forlög þó að þyki hörð´
Þar við hver einn eiri.
Allir verða jafnir jörð
ég og þú og fleiri.

Þegar vorsins ljóma ljós
lýsir auga mínu.
Get ég til að gullin rós
grói á leiði þínu.