Dýrólína Jónsdóttir 1877–1939

Dýrólína var fædd á Hrauni í Goðdalasókn í Skagafirði, dóttir Jóns Guðmundssonar (1847–1914) og fyrri konu hans, Guðrúnar Pálsdóttur (1849– 1884). Hún missti ung móður sína og var um tíma hjá móðursystkinum sínum en flutti síðan aftur til föður síns og ólst upp hjá honum. Dýrólína var tvo vetur (1897–1899) í kvennaskóla Akureyrar og síðar einn vetur í Reykjavík og mun þar eitthvað hafa notið tilsagnar hjá frænda sínum Pálma Pálssyni menntaskólakennara. Hún kenndi síðan börnum í Goðdalasókn á árunum 1902–1906 og 1907–1909. Árið 1915 giftist hún Birni Guðmundssyni bónda á Fagranesi á Reykjaströnd og átti þar heima til dauðadags 1939. – Dýrólína var góður hagyrðingur og fékkst einnig nokkuð við smásagnagerð í stopulum tómstundum.