Morgunfegurð

Nú er frítt við fjarðarstrendur
fyllir loftið vængjablak.
Þíður blærinn sumri sendur
sveipar lífsins andartak.
Yfir landi tíbrá titrar
töfrar dagsins gígjuspil.
Fagur vorsins gróður glitrar,
gleðst við morgunsólaryl.

Allt er nú sem endurvakið,
örvað nýjum gleðihljóm,
laufguð rós og lóukvakið
lofa mildan skapadóm.
Söngur allra sumargesta
semur lífi þakkargjörð.
Náttúrunnar munað mesta
miðlar okkar fósturjörð.