A 33 - Lofsöngur Simeonis: Nunc dimittis

Þessi sálmur er bein þýðing á sálmi Lúthers, Mit Fried und Freud ich fahr dahin, sem er ortur út af Lofsöng Simeons, Lúkas 2. 29–32 og er sá söngur frá fornu fari fastur liður í kvöldtíðum kirkjunnar. Þýðing Marteins biskups finnst ekki annars staðar. Í Sálmabók 1589 er sálmur þessi í tveimur útgáfum: Ó, Herra Guð, í þínum frið (nr. 46) og: Héðan í burt með friði ég fer (nr. 47). Síðarnefndi sálmurinn er í Graduale og sálmabókum öllum til 1801. Hann kemur að nýju í Sálmabók 1886 í þýðingu Helga Hálfdánarsonar og er þannig í Sálmabók 1972, Nú héðan á burt í friði ég fer. Hann er nr. 665 í Sálmabók 2022.