Saffó (Sappho) 620–570

Saffó (Sapfó, Psapfο) var forngrísk skáldkona sem sögð var fædd í Eressos á eyjunni Lesbos einhvern tíma milli 630 og 612 f.o.t. og hafa dáið kringum 570 f.o.t. Lítið hefur varðveist af kvæðum hennar en hún hafði gríðarlega mikil áhrif og talin með ljóðskáldunum níu í Grikklandi; hún var stundum nefnd tíunda menntagyðjan. Verk hennar voru samin á eólísku fyrir söng með undirspili lýru. Kvæði hennar eru með þeim fyrstu sem fjalla um veraldlega hluti og reynslu einstaklingsins. Í sumum þeirra talar ljóðmælandinn um ást sína til kvenna, sem hefur gefið tilefni til að ætla að hún hafi verið samkynhneigð og var orðið lesbía því dregið af nafni eyjarinnar Lesbos.