Árni Jónsson Eyjafjarðarskáld 1760–1816

Árni var fæddur á Rifkelsstöðum í Eyjafirði, sonur Jóns Jónssonar bónda þar og konu hans, Sigríðar Hannesdóttur. Barnungur var hann tekinn í fóstur til hjónanna á Stóra-Hamri, Magnúsar Jónssonar hreppstjóra og Guðrúnar Sigurðardóttur. Um tvítugt eignaðist hann sveinbarn með Sigríði Magnúsdóttur á Kambi, næsta bæ við Stóra-Hamar, en ekki varð af frekara sambandi þeirra á milli. Sveinninn hét Jóhannes og varð síðar þekktur hagyrðingur og rímnaskáld. Rúmlega þrítugur kvæntist Árni Ingibjörgu Gunnsteinsdóttur. Þau áttu heima á ýmsum   MEIRA ↲

Árni var fæddur á Rifkelsstöðum í Eyjafirði, sonur Jóns Jónssonar bónda þar og konu hans, Sigríðar Hannesdóttur. Barnungur var hann tekinn í fóstur til hjónanna á Stóra-Hamri, Magnúsar Jónssonar hreppstjóra og Guðrúnar Sigurðardóttur. Um tvítugt eignaðist hann sveinbarn með Sigríði Magnúsdóttur á Kambi, næsta bæ við Stóra-Hamar, en ekki varð af frekara sambandi þeirra á milli. Sveinninn hét Jóhannes og varð síðar þekktur hagyrðingur og rímnaskáld. Rúmlega þrítugur kvæntist Árni Ingibjörgu Gunnsteinsdóttur. Þau áttu heima á ýmsum bæjum í Eyjafirði en síðast bjuggu þau á Sámsstöðum og þar dó Árni 1. ágúst 1816. Þau hjón voru jafnan fátæk og börðust í bökkum.
   Árni var með kunnustu alþýðuskáldum norðanlands á sinni tíð og er talsvert varðveitt af kveðskap hans á handritadeild Landsbókasafns. Tveir langir rímnaflokkar eru varðveittir eftir hann: Rímur af Víga-Glúms sögu (18 rímur) og Rímur af Sigmundi Brestissyni (22 rímur). (Rímnatal II, bls. 13.) og þá eru Hjónaríma prentuð í Hafurskinnu I 1944 og Svaðilför prentuð í Stakar rímur  1960, og fleiri rímur hafa honum verið eignaðar. (Sjá einkum Rit Rímnafélagsins IX. Stakar rímur frá 16., 17., 18. og 19. öld 1960; Rímnatal II, 1966, bls. 13) og Amma, 2. hefti, Reykjavík 1938).   ↑ MINNA