Tómas Sæmundsson

Þau forlög hefur Ísland átt
allt síðan fyrst það byggjast náði,
á bak þeim hefur horfa mátt
er hyggja vildu að landsins ráði,
það hefur átt margan mætan son
en misst hann þegar síst var von.

Það sá þig, Tómas, hvílu í
halla þér dags að miðju skeiði;
það býr stálhjarta í brjósti því
sem bragðhresst fer hjá þínu leiði
og mynnist að fagur-byrjuð braut
við banasæng þína endi hlaut.

En þú, sem um dauðra reikar reit
og rifjar fyrir þér missi harða,
vit: hann, hvers lát nú syrgir sveit,
sér hefur reistan minnisvarða
sem þeirra mun skyggja þúfur á
sem þemba nú hans moldum hjá.
(1/5 1841)