Hjálpa oss, Guð, í heimsins vist

Annar P[s]almur Ejusde: Auct: [þ.e. Hallgrímur Pétursson]
Tón: Halt oss, Guð, við þitt hreina orð
Hjálpa oss, Guð, í heimsins vist,
hjálpa oss, Guð, fyrir Jesúm Krist,
hjálpi oss, Guð, að heiðra sig,
hjálpa oss, Guð, að trúa á þig.

Hjálpa oss, Guð, í heilsu og sótt,
hjálpa oss, Guð, á degi og nótt,
hjálpi oss, Guð, á hvörri stund,
hjálpi oss, Guð, við dauðans fund.

Hjálpi oss, Guð, þá gengur lítt,
hjálpi oss, Guð, þá fellur blítt,
hjálpi oss, Guð, um helgan auð,
hjálpi oss, Guð, um daglegt brauð.

Hjálpi oss, Guð, um hjartað hreint,
hjálpa oss, Guð, minn ljóst og leynt,
hjálpi oss, Guð, við hryggðar kíf,
hjálpi oss, Guð, við eilíft líf.

Hjálpi oss, Guð, sem hjálpa má,
hjálpi oss, Jesús, djöfli frá,
hjálpi oss, Guð, svo helgumst vær,
hjálpin drottins sé yfir oss kær.
Amen.