Einar Sigurðsson á Reykjarhóli 1843–1910

Einar var fæddur á Nolli við Eyjafjörð, sonur Sigurðar Einarssonar vinnumanns og konu hans, Kristínar Jónasdóttur. Einar missti móður sína þriggja ára gamall og var honum þá komið fyrir hjá föðursystur sinni, Rósu Einarsdóttur á Skriðulandi, og manni hennar, Stefáni Guðmundssyni. Þau fluttu síðan á Djúpárbakka og þaðan að Vöglum á Þelamörk. Ólst Einar upp hjá þeim hjónum í Eyjafirði en fluttist til Skagafjarðar 1868. Var hann þar fyrst í vistum en varð síðar bóndi á Kárastöðum 1874–1877 og Reykjarhóli hjá Víðimýri 1877–1907. Kona Einars var Rósa Gunnlaugsdóttir. Einar var gleðimaður og ágætur hagyrðingur. (Sjá: Skagfirzkar æviskrár 1890–1910, III. Akureyri 1968), bls. 52 og Hannes Pétursson: „Einar á Reykjarhóli.“ Skagfirðingabók 3, bls. 118–156).